Dya ruman ako sa babaw ka puno ka twitis. Gaharahablay sa sanga samtang gapaayaw-ayaw turuk kay Patring nga nagapanahup ka bugas. Ingud balay namun si Patring, klasmit ko, kag pinakagwapa sa tanan nga mga bayi sa klase. Ang ana tagahawak nga buhok, daw kugon nga ginahuyup ka hangin kon maglinggi-linggi tana ka panahup. Kanami gid turukun kon wahigun na ang ana buhok kag isukbit sa ana talinga para mamulalngan na kamayad ang pasi sa kararaw. Haaay ... Patring! San-o ko ayhan masagamsaman ang kalum-uk kang imo buhok? San-o mo ayhan ako mayuhuman kag tawgun ang akun ngaran ....

"Badong! Badong! Dyan kaw ruman gapaamulya sa twitis. Gabok bay ria. Mahulog kaw gani kag mabari ... ay, tawgun timo sabun nga Badong Buktot! Amo bay ra natabo kay Tibo Buktot!"

Si Nanay. Ginautod na gid pirmi ang panamguhanun ko. Dayon na kara sugpon nga si Tibo Buktot, nahulog sa bugto't-tai sobra nga palagyo kag panago kay Nanay na, hay tamad maglawig ka karbaw.

"Ti, mirisi na, sa sobra na katamad maglawig ka karbaw, kadya karbaw na run lang makauyon mag-imaw kana."

Mga lapot-lapot tana kis-a komentar ni Nanay nga dya. Nanaog lamang ako hay nabatian ni Patring ang pagsyagit ni Nanay kag dayon na tangra sa twitis. Mayad lang abtik ko magkabit nga daw amo kag manginpadlus, kondi sa lupa run takun kang magtangra si Patring. Ay, praktisado dya run! Mayad lang pa gid hay rabong kasla sa kudal. Bisan magkuub si Patring, di na ko makita. Aguy, madakpan abi takun ni Patring nga gaparapasiplat kana, makupus gid guro ako sa kahuya. Basi maugut pa kanakun kag indi na run ko pag-istoryahun kon magdungan kami panaw sa kahon paagto sa eskwelahan.

Mayha gid bay takun kay Patring hay kada turuk ko ka itsura na, daw gaparang-init tana akun gising-gisingan. Ambay ano tana dya nga pamatyag akun.

Dumduman ko kang grid wan kami. Adlaw-adlaw ko gid ra ginadunganan si Patring paagto sa eskwelahan. Ginatiid ko ra anay kwarto na hay kitaun sa buho ka dingding namun nga ginkutkot ko para magbahul. Memoryado ko run ra hulag na: suksok ka bayo, mamulbos, manghusay, mabuul ka bag kag magpanaw. Kon paagto run gani ra sa burutangan ka bag na, madalagan run ko panaog para paggwa na sa anda kudal, gapanaw takun run sa unahan na. Kis-a daw mabarambud tana akun batiis samtang gapanaw hay gaparaniskug takun maminsar nga gaturuk si Patring kanakun! Ay, maan lang kadya. Ginasusul ko gid nga maunahan tana gihapon hay amo lang dya paagi nga matalupangdan na ako.

Taga Mao-it tana ra kanday Patring. Mga tatlo ka bukid ang karayuun sa sitio namun. Nagsaylo lang ra tanda rugya hay para rapit gawa panawun na paagto sa eskwelahan.

"Bahul gid tana handum ko para sa bata ko ngara," ang muno ni Nanay na kay Nanay ko samtang gapanghilamon tanda sa kilid ka kudal. "Amo nga bisan magrayuay kami ni Tatay na, batasun ko, makaeskwela lang si Patring."

Paratuon si Patring. Kada gabii, ginapasigahan gid ra ka pitromaks ni Lolo na para sanag kon magtuon. Kang wara pa kaabot si Patring kanamun, daw mabaribad raad takun kay Nanay nga indi lang ako mag-eskwela hay mabantay lang takun ka karbaw. Ginakapoy takun manumdum nga Lunis hasta Byernes, manglaktud takun sa kahon bitbit ang notbuk kag lapis. Tapos pag-abot sa eskwelahan, mapungko kag mamati sa mistra. Abaw, sa kalawid-lawid kuno ka klase kuon ni Pato. Kis-a kuno ginapatu tana ka stik ka mistra hay garalaway tana ka turog. Kon si Pato gani nga daw isda papulawun gakaturugan, ako pa ayhan nga daw mantika magturog. Aguy, dan, basi mahuraguk gid takun ka turog!

Pero dasig nga nagbaylo ang pinsar ko kang nakita ko si Patring.

- Sundi ang kasugpon kang atun sugidanun -